Witze| Gedichte |
Oaf Besack
Autor unbekannt
Der Titz vum gielen Rengchen ,die wor egst oaf Besack an München ,
och weder ungeleongt derhegm , berecht hie sengem Noberengm :
Ai, bas oaf Kopesch geng et dech , dro doahar ferder zoch at sech ,
glech wä der Zeach wor ungereackt , nogm ech ereuß det Angesoackt :
Bröckt , Boaflesch och de Floasch mat Weng , ent docht mer : Gott erholt dech Treng ,
sorch uaf de Kaingt mer och de Schweng , und denk un Oallerläwsten deng !
Meng Siwenberjerlongt , aje , ech zähn nea an de RE-FE-GE .
Dro hat de Floasch ech zeagestopt , ent wor bas Wähn ewenich agenopt .
Dürt wurt oaf mech schöng am Peron , glech meng Kusin , der Honnes Hon
mat dem fuhr ech am Riesenregf , wai wä mir nohier schmuackt det Gesegf.
An München oaf der Hauptstation , do soch ech nemel`n Soacksen stohn
am doten soht ech ken en Bayern : ,,wo as der Gierlich eos Größschaiern ?"
Die frocht mech : ,,Parlo italiano ?" und ech ongfert : ,,Habarnamo,
Din Schura Mare , nix Milano " ,
Doch schöng längst , hühl an det Wader , an er kurtscher Goatch eos Lader
mat em Paschel oaf dem Huot , steangt eas Hans - schimbat de tot
die hat an´t Hofbräu mech gezoadert , wo ech mech straschnik dro befloddert .
Em seft do`t Bär eos gloseran Stiveln , ent kannt minune sich beknifeln .
Meng Schwejeran , det bayerisch Wali , dot gof mir glech en Wiskipoli ,
na beßer wä dot liurkesch Zech , schmoackt mir be eas de Koampestgech .
An Stuttgart hegßt eas Mai nea Märi , dot schenkt mir an en Stampel Schäri ,
ent frocht mech detsch : ,,Schmeckt dir der Drink ?, " ai docht ech mir , Flur mat der Henk ,
und wunn ir mech hut här geroffen , giet mir ast ustand`jet ze soffen .
Droaf soht eas Märi : ,,Wonder`ful , jetzt mußt du in den Schwimmingpool ".
Dot as esi en Poadel zem tschippeln , wur em sich tankt noh`m Wiskikippeln.
Und dro schar hat ech et vergeßen , wet at do git für sposech Eßen :
Den Keachen , Nnedel och den Schnitzel , bekid em oallest am Schtanitzel .
Mir gaf en Supp nor ,,Schwanz vom Ochs" , und ech sehngt mich no Kehspaliokz ,
och no ,,Tocana de burez " ,mat em seoren Kroatzenwetz .
Et iwerkongm mech det Gewengmer , wä ech docht un dien Iasenziemer ,
dien ech nea suhl eruwer-schlacken , und docht derbä ech siel verracken ,
mehr egster nor , mehr wil ech rachen , en siwenberjersch Krehmschnitt-Keachen .
Zem Schloaß bekongm ech Sahneschnitten , dot sen de Bundesdetsch Kletitten .
An Hamburg oaf der Reeperbahn , wot moßten do meng Ujen sahn ,
am Mini , Midi och an Maxis , gor recklech Medcher ziejen anar Praxis ,
schar ohnen Schirz och Pantalone , gon sä do purdech ,,oblu ohne" ,
em denkt em wehr am Paradies , eangder dem noackejen Geschmiess .
Und wä dä weckeln och sech scherlan , derzea wä rosendech schar berlen .
Mech trof der Schloch Gefoadder Misch , sä sohn derzea dot wehr ,,Sexisch".
Nea frojen ech hut ir gesähn , esi mundurt bä eas de Frähn
bä eas bekitt em jo schöng Händel , wun em sech nehert nor dem Pandel ,
am doten , gliewen ech , mir meßten , eas Frähen wä do am wilden Westen ,
och oaf dot neusexisch egst testen .
Doch eangder eas gesoht Gefoadder , dot as dech schwer für`n olden Koadder
oder em schlackt oaf jeden Foall , für dem Gebreoch ,,Gerovital" ,
ansonsten geht die Sache schief ,och et bleift nor bäm Aperitif .
und durch det Schlasselloch nor kännt`r , kocken an det Eroszzännter .
Doch ech , ech ban für den Progress , am dot meng Treng am Harwest meß ,
sech rommen oaf Europariegs , an Hamburg lieren det Schripptiess ,
und bä dem purdejen Gewäcks , ze äwen sech am Gruppensäx .
Wä ech nea do eram det scherjen , vergoss ech scharr oaf Siwenberjen .
Ech hat mir inten ungezwinkert , suhl at de Krohen , verfleachter Pinkert ,
wo ech at nohir unsoch dong , wor dech det Hippiwiesen en Mong .
,,Wai " kregsch ech ,,elander Golan , sie sind ja ein maschkurierter Mann "!
Na wenn`s auch so herumersäxeln , dann muß ein Sax sie ja verwechseln ,
und überhaupt , schneiden`s sich die Haare , bei uns gehn so nur ,,Kortorare"
Doch ken mech soht ech , Nober Ihm , nea , Titzen Pitz nea meßt tea hihm ,
sonst kengt at dir hä noch passieren , dot des dich ämanipulieren ,
und wunn tea länger bleiwst noch hä , dro wird eos dir och noch en Frä !
Schniel soch ech noh , doch bas zer Zihn ,wor ech noch aingden maskulin .
Wä wor ech früh , doch soht ir Lekt , am Christiwallen , wot gescheckt ,
wun sech de Mod nea och bä eaß , hut eosgebreckt vun Broos bas Schaas ,
und bast tea hengmen , Harr sech za , en Mong geworden as deng Fra .
Et wort mir ujenblacklech klor , dot do meng Bleiwens nimi wor ,
drum , hü zer Bohn und hurtech jutte , nogm ech oaf Kopesch mir den dutte ,
dänn de Billetter hatt zem Glack , ech tur-retur och weder zerrack .
An Kopesch dronk ech oaf en Sitz , für Froad en Zuika och en Spritz ,
derhihm meng Trengo , Gott soa Donk , soss für dem Dirchen oaf der Bonk ,
und wä ech nohsoch , oaf en Hoor , noch aingden eaverandert wor .
Nea Fraingd , hä oingdet meng Bericht , meng Treng dot as och geat och licht ,
doch - eine Bessere fand ich nicht .
................................................